Ekkert lát á átökunum í Sýrlandi

Ekkert lát er á átökunum í Sýrlandi og létu um 30 manns lífið í bardögum í borginni Homs í gærdag.

Sýrlensk mannréttindasamtök greina frá því að skriðdrekum hafi verið beitt gegn almennum borgurum í nokkrum hverfum borgarinnar. Þá bárust fréttir um að 11 hermenn hefðu fallið og margir særst í bardögum nálægt landamærunum að Tyrklandi.

Arababandalagið hefur boðið sýrlenskum stjórnvöldum til viðræðna í Kaíró þar sem ræða á hvernig hægt sé að stöðva átökin. Óvíst er hvort Sýrlendingar muni taka þátt í þeim viðræðum.