Ólafur Jóhannesson: Stoltur af liðinu

Ólafur Jóhannesson stýrði íslenska landsliðinu í síðasta sinn í 5-3 tapleiknum gegn Portúgal í undankeppni Evrópumótsins í kvöld. Þjálfarinn var stoltur af liðinu þrátt fyrir tapið.

Ég er mjög ánægður með leik okkar manna en að staðan skyldi vera 3-0 í hálfleik er ótrúlegt og mjög ósanngjarnt. Við áttum 2-3 góð færi í fyrri hálfleik í stöðunni 0-0. Eins og ég sagði fyrir leikinn þá eru Portúgalar góðir í fótbolta þegar þeir hafa boltann en þeir eru ekkert duglegir að verjast. Við nýttum okkur það ágætlega. Mér fannst Birkir Bjarnason og Aron Gunnar Einarsson alltaf vera fríir á miðjunni. Sérstaklega í fyrri hálfleik en okkur gekk illa að finna þá – sérstaklega í fyrri hálfleik. Fyrsta markið sem við fengum á okkur þá var hendi á leikmann Portúgals en ekkert var dæmt. Þeir fengu hornspyrnu sem þeir áttu aldrei að fá og skoruðu. Annað markið var slysalegt.

„Ég sagði í hálfleik að það væri mjög auðvelt að hætta núna, og spurði hvort við værum menn eða ekki. Það lögðust allir á eitt um að gera betur og vinna seinni hálfleikinn. Við vorum með það á hreinu og gerðum það. Heilt yfir get ég verið stoltur af liðinu, menn gáfu sig alla í þetta þótt að á móti blési."

Guðmundur Benediktsson íþróttafréttamaður á Stöð 2 sport spurði Ólaf hvort þessi leikur væri sá besti undir hans stjórn. „Það er erfitt að segja. Þessi leikur fer örugglega hátt á þeim skala – ég held að menn hafi skemmt sér mjög vel." Ólafur hefur verið orðaður við lið Hauka en hann vildi ekki játa þeim orðrómi. „Það eru meiri líkur á því að ég fari að þjálfa – kannski bara sjálfan mig, ekki veitir af. En þetta skýrist fljótlega." Guðmundur spurði Ólaf af því hvort hann myndi segja já ef honum yrði boðið starf landsliðsþjálfara einhverntíma aftur og svarið var stutt og hnitmiðað: Já.