David Silva: Del Bosque vill ekki nota mig í spænska landsliðinu

David Silva hefur spilað frábærlega fyrir lið Manchester City í fyrstu leikjum tímabilsins í ensku úrvalsdeildinni en einn besti leikmaður ensku úrvalsdeildarinnar er ekki nógu góður fyrir spænska landsliðið.

David Silva er sár yfir fáum tækifærum sem hann hefur fengið undanfarið með spænska landsliðinu en hann segir það skipti engu máli hvernig hann muni spila í vetur því hann verði alltaf á bekknum.

David Silva hefur ekki verið í náðinni hjá Vicente del Bosque síðan að hann lék fyrstu 62 mínúturnar í 0-1 tapi liðsins á móti Sviss í úrslitakeppni HM sumarið 2010. Silva fékk aðeins að spila í samtals fimm mínútur í síðustu sex leikjum liðsins á HM sem Spánverjar unnu alla. Silva hefur síðan verið í aukahlutverki í undankeppni EM 2012.

„Þjálfarinn treystir ekki á mig og það skiptir að mínu mati engu máli hvernig ég stend mig því ég fæ engin tækifæri í byrjunarliðinu. Ég er eina fórnarlambið úr þessu tapi á móti Sviss í Suður-Afríku," sagði David Silva í viðtali við Marca.

„Ég er ekki ánægður en ég sé ekkert í spilunum um að staða mín í landsliðinu muni eitthvað breytast," sagði David Silva sem hefur skorað 11 mörk í 49 landsleikjum og varð bæði Heims- og Evrópumeistari með liðinu. David Silva er alltaf í hópnum en hann hefur aðeins verið í byrjunarliðinu í tveimur af sex leikjum Spánverja í undankeppni EM 2012.

„Mér finnst líka oft eins og það hafi skaðað mína möguleika í landsliðinu að hafa ekki endað hjá Barcelona eða Real Madrid," sagði Silva en Manchester City keypti hann á 30 milljónir evra frá Valencia síðasta sumar.