Enski boltinn: Upphitun fyrir leiki dagsins

Mikil eftirvænting er fyrir leiki dagsins í ensku úrvalsdeildinni í dag. Íslendingaslagur verður á Loftus Road, tvö af kaupóðustu félögunum mætast á Anfield og vonandi verður boðið upp á jafnmikla markaveislu á St. James' Park og í fyrra. Kíkjum nánar á málið.



Klukkan 14

Blackburn - Wolves (Sport 5)

Liðin áttu í mikilli baráttu um að halda sæti sínu í úrvalsdeildinni á síðustu leiktíð. Liðin mættust í lokaumferðinni og þurftu sigur til þess að tryggja sig. Svo fór að Blackburn hafði 3-2 sigur en úrslit í öðrum leikjum þýddu að bæði lið björguðu sér frá falli.

Reiknað er með því að bæði lið verði í botnbaráttu í vetur enda lítið styrkt sig. Jamie O'Hara hefur þó samið við Wolves og Blackburn reiknar með miklu af argentínska framherjanum Mauro Formica.

Fulham - Aston Villa(Sport 4)

Lærisveinar Martin Jol og Alex McLeish leiða saman hesta sína á Craven Cottage. Fróðlegt verður að sjá hvort bræðurnir John Arne og Björn Helge Riise verði í byrjunarliði Fulham.

Aston Villa hefur misst stóra bita í sumar. Stewart Downing fór til Liverpool, Ashley Young til Manchester United auk þess sem John Carew er farinn til West Ham. Shay Given stendur vaktina í markinu og verður í lykilhlutverki hjá Aston Villa ásamt Charlez N'Zogbia.

Liverpool - Sunderland(Sport 2 & HD)

Jordan Henderson mætir sínum gömlu félögum í Sunderland á Anfield. Liverpool hefur farið mikinn á leikmannamarkaðnum í sumar. Luis Suarez er enn að jafna sig eftir Copa America og Steven Gerrard hefur glímt við meiðsli. Flestir aðrir ættu að vera klárir og verður fróðlegt að sjá hvort Downing, Adam, Henderson, Enrique og Carroll komi allir við sögu. Carroll glímdi við meiðsli síðari hluta síðasta tímabils en verður í lykilhlutverki í upphafi tímabils í fjarveru Úrúgvæjans.

Sunderland hefur ekki eytt jafnmiklu og Liverpool en keypt fleiri menn. John O'Shea og Wes Brown komu frá United, Connor Wickham frá Ipswich, Sebastian Larson og Craig Gardner frá Birmingham. Alls hefur Steve Bruce nælt í tíu nýja leikmenn og verður fróðlegt að sjá hvort Svörtu kettirnir geti strítt liðsmönnum Kenny Dalglish.

 

QPR - Bolton(Sport 3)

Það verður Íslendingaslagur á Loftus Road í Lundúnum þegar QPR tekur á móti Bolton. Heiðar Helguson verður í leikmannahópi QPR en óvíst hversu mikinn þátt hann tekur í leiknum. QPR hefur bætt við sig framherjum og tóku meðal annars níuna af Heiðari sem leikur í treyju númer 22 á þessu tímabili.

Grétar Rafn Steinsson hefur sitt fjórða tímabil hjá Bolton. Owen Coyle hefur misst nokkra sterka leikmenn á borð við Johan Elmander og Matthew Taylor. Kevin Davies verður á sínum stað og verður væntanlega duglegur að brjóta á andstæðingnum líkt og undanfarin ár.

Wigan - Norwich(Sport 6)

Paul Lambert mætir með Kanarífuglana á DW-völlinn í Wigan. Wigan tókst enn á ný að halda sæti sínu í deildinni á síðasta ári þrátt fyrir spár um annað. Norwich er nokkuð óskrifað blað líkt og Blackpool í fyrra og fátt um þekkt nöfn.

Wigan seldi sinn besta mann, Charles N'Zogbia til Aston Villa og hefur lítið styrkt sig. Þeir töpuðu stórt á heimavelli gegn nýliðum Blackpool í fyrstu umferðinni í fyrra þar sem Marlon Harewood fór á kostum. Þeir vilja vafalítið ekki láta það henda aftur.

Klukkan 16.30

Newcastle - Arsenal(Sport 2 & HD)

Besti leikur síðasta tímabils í úrvalsdeildinni var vafalítið 4-4 jafntefli liðanna á St. James' Park í fyrra. Arsenal komst í 0-4 en missti Diaby útaf og leikur liðsins hrundi. Fabregas og Nasri eru hvorugur í leikmannahópi Arsene Wegner en liðið hefur virkað brotthætt á undirbúningstímabilinu.

Newcastle hefur selt Kevin Nolan og Jose Enrique auk þess sem Twitter-fíkillinn Joey Barton er ekki í náðinni. Gabriel Obertan verður væntanlega í lið Newcastle en hann stóð sig mjög vel á undirbúningstímabilinu með Manchester United.