Umfjöllun: Grindvíkingar stálu stigi á Hlíðarenda

Valur og Grindavík skildu jöfn 1-1 á Hlíðarenda í kvöld. Óhætt er að segja að Grindvíkingar hafi sloppið með skrekkinn enda skoruðu þeir mark sitt úr eina færi þeirra í leiknum. Valsarar skutu 21 sinni að marki en aðeins einu sinni hafnaði boltinn í netinu.

Fyrri hálfleikur fór afar rólega af stað á Hlíðarenda. Framan af var lítið um færi. Christian Mouritsen átti skalla af stuttu færi eftir sendingu Guðjóns Péturs Lýðssonar en náði ekki að halda boltanum niðri. Annars bar hæst hjólhestaspyrnutilraun Atla Sveins Þórarinssonar utarlega í teignum sem lak framhjá markinu.

Undir lok fyrri hálfleiks tók Alexander Magnússon á rás upp vinstri kantinn. Alexander, sem lék í stöðu vinstri bakvarðar í kvöld, sendi fínan bolta fyrir markið þar sem Magnús Björgvinsson skallaði boltann í varnarmann Vals og framhjá Haraldi í markinu. Markið þvert á gang leiksins og gestirnir yfir í hálfleik.

Valsarar voru mun sprækari í síðari hálfleik og blésu til sóknar. Eftir aðeins fimm mínútna leik átti Guðjón Pétur frábæra sendingu á Matthías Guðmundsson sem afgreiddi boltann frábærlega í nærhornið. Valsarar sköpuðu sér færi í kjölfærið og komst Arnar Sveinn einn í gegn en missti boltann alltof langt frá sér.

Annars gekk Valsmönnum lítið að ógna marki Óskars Péturssonar fyrr en í blálokin. Fyrst skoruðu Grindvíkingar næstum því sjálfsmark eftir hornspyrnu þegar boltinn hrökk í stönginni. Skömmu síðar átti Arnar Sveinn fínan skalla sem stefndi í fjærhornið en Óskar Pétursson náði á ótrúlegan hátt að verja.

Valsmenn reyndu allt hvað þeir gátu og fengu einhverra hluta vegna sex mínútur í uppbótartíma en tókst ekki að skora. Svekkjandi jafntefli fyrir þá rauðklæddu sem töpuðu stigum fjórða leikinn í röð en Grindvíkingar geta þakkað fyrir stigið.

Hér fyrir neðan má sjá allar helstu upplýsingar um framvindu leiksins, leikmannahópa liðanna auk textalýsingar frá blaðamanni Vísis á vellinum.