Umfjöllun: KR valtaði yfir Breiðablik

KR vann afar öruggan og sannfærandi 4-0 sigur á Íslandsmeisturum Breiðabliks er liðin mættust í Vesturbænum í kvöld. KR-ingar því enn ósigraðir á toppi Pepsi-deildar karla.

Blikar ætluðu sér að pressa stíft í byrjun leiks og eltu boltann út um allt án þess að ná til hans. Eftir rúmlega mínútuleik fengu Blikar rothögg sem þeir jöfnuðu sig aldrei á. Þá skoraði Guðjón Baldvinsson eftir stutta hornspyrnu Óskars Arnar og fyrirgjöf Bjarna Guðjónssonar.

KR-ingar voru vart búnir að fagna markinu þegar Kristinn Jónsson, vinstri bakvörður Blika, fíflaði Skúla Jón og komst einn gegn Hannesi en sendi boltann framhjá. Dauðafæri sem Blikar hefðu þurft að nýta.

Það er greinilegt að Blikar sakna Elfars Freys sárt í loftinu í föstum leikatriðum. Um miðjan hálfleikinn skoruðu KR-ingar, aftur eftir hornspyrnu. Nú sendi Bjarni inná teiginn, Blikum tókst ekki að koma boltanum frá og Skúli Jón sendi knöttinn efst í markhornið með vinstri fæti.

Blikarnir ógnuðu marki KR í raun aðeins einu sinni af alvöru í hálfleiknum. Þá átti Kristinn Jónsson hörkuskot úr aukaspyrnu af um 25 metra færi sem small í þverslánni. Frábært skot en heppnin ekki með Blikum.

Þremur mínútum fyrir hálfleikinn skoraði KR þriðja markið. Óskar Örn tók hornspyrnu sem fór beint á nærstöngina þar sem sárvantaði Blika og boltinn skreið undir Ingvar Þór Kale í marki Blika. Virkilega klaufalegt og KR með þriggja marka forskot í hálfleik.

KR-ingar voru áfram sterkari aðilinn í síðari hálfleik sem var töluvert daufari en sá fyrri. Dylan Macallister fékk gott færi snemma í hálfleiknum en skotið framhjá. á 74. mínútu fengu KR-ingar vítaspyrnu eftir að Arnór Sveinn braut á Kjartani Henry. Hann fór sjálfur á punktinn og skoraði örugglega.

Kristinn Steindórsson ógnaði marki KR tvisvar í síðari hálfleiknum en í bæði skiptin sá Hannes Þór við honum. Fyrst skaut Kristinn með vinstri fyrir utan teig en Hannes varði glæsilega. Í síðara skiptið komst Kristinn einn gegn Hannesi og ætlaði að leggja boltann í fjærhornið. Hannes varði hins vegar aftur frábærlega í horn.

Hinum megin fengu KR-ingar nokkur færi, sérstaklega var Guðjón Baldvinsson skæður en Ingvar Þór sá við honum.

Frábær sigur KR-inga á Íslandsmeisturum Breiðabliks sem virkuðu vængbrotnir og baráttulausir í kvöld. Sigurganga KR-inga heldur áfram og liðið virðist sem fyrr óstöðvandi.



TölfræðiSkot (á mark): 17-10 (9-2)

Varin skot: Hannes 2 – Ingvar 5

Horn: 9-8

Aukaspyrnur fengnar: 10-9

Rangstöður: 2-3

Áhorfendur: 2050

Dómari: Valgeir Valgeirsson  7.