KR mætir BÍ/Bolungarvík um Verslunarmannahelgina

Góður árangur KR-inga í undankeppni Evrópudeildar þýðir tilfæringar á leikjum liðsins í öðrum keppnum. Bikarleikur KR gegn BÍ/Bolungarvík hefur verið færður á Verslunarmannahelgina. KR mætir Dinamo Tbilisi fimmtudaginn 28. júlí á KR-velli og viku síðar í Georgíu.

Upphaflega átti viðureign BÍ/Bolungarvíkur og KR í undanúrslitum Valitor-bikarsins að fara fram fimmtudagskvöldið 28. júlí. Ný tímasetning leiksins á Torfnesvelli er sunnudagurinn 31. júlí klukkan 16.

Það er óhætt að segja að það sé skammt stórra högga á milli hjá KR-liðinu. Sunnudagskvöldið 24. júlí mætir liðið Íslandsmeisturum Breiðabliks. Fimmtudagskvöldið 28. júlí mæta Dinamo-menn á KR-völlinn. Þvínæst er mæting á Ísafjörð 31. júlí og svo fínasta ferðalag til Tbilisi þar sem flautað verður til leiks 4. ágúst.

Þá er ljóst að fresta verður viðureign Keflavíkur og KR í Pepsi-deild karla sem fram átti að fara 3. ágúst.

Fimm leikir á fimmtán dögum hjá Vesturbæingum og nóg af flugferðum. KR-ingar hafa fengið tæpar 45 milljónir króna í kassann fyrir árangur sinn í Evrópudeildinni.