Rúnar Kristins: Þessi fer upp í hillu á skrifstofunni

Rúnar Kristinsson þjálfari KR var valinn besti þjálfari umferða 1-11 í Pepsi-deild karla. KR-liðið er ósigrað í deildinni og með gott forskot á toppnum. Rúnar segir lykilinn að árangrinum samheldinn leikmannahóp sem vinnur eftir skýrum markmiðum.

„Jú, þetta kemur auðvitað aðeins á óvart. Það eru aðrir þjálfarar að standa sig vel en ánægjulegt að verða fyrir valinu.

Rúnar hefur unnið til fjölda verðlauna og hlotið viðurkenningar á löngum ferli. Skyldi verðlaunaskjöldur dagsins fara upp á vegg í stofu?

„Þessi fer á skrifstofuna. Upp á hillu þar. Maður reynir að prýða skrifstofuna með einhverju tengdu KR

Árangur KR í sumar hefur verið frábær. Liðið hefur aðeins tapað einum leik í allt sumar og það var 2-0 tap í Evrópueinvíginu gegn Zilina, einvígi sem vannst 3-2 samanlagt.

„Samheldinn leikmannahópur. Leikmenn sem vilja ná árangri og settu sér skýr markmið fyrir sumarið. Þeir eru að vinna eftir," segir Rúnar um lykilinn að árangri KR í sumar.

Rúnar var hluti af þjálfarateymi Loga Ólafssonar síðastliðið sumar. Gengi KR-inga þótti ekki nógu gott svo að Logi var látinn fara og Rúnar tók sjálfur við starfi aðalþjálfara. Undirritaður bað Rúnar um að útskýra hvaða breyting hefði orðið hjá KR eftir að hann tók við.

„Það er erfitt. Við Logi og Pétur Pétursson störfuðum saman þegar við komum fyrst að þessu. Sóttum leikmenn og byggðum upp lið. Vorum að vinna eftir ákveðnu spilmunstri sem við viljum búa til. Logi var á góðri leið með það en það kannski heppnaðist ekki alveg. Ég tek svo við og byggi ofan á það. Kem með mínar áherslur.

Mesta breytingin er kannski sú að ég stjórna liðinu inni í klefa. Kem með mínar áherslur og reyni að spila fótbolta eins og ég vil spila. Það eru alltaf örlitlar áherslubreytingar. Logi var með eina línu og ég aðra. Þó hún hafi verið svipuð þá eru smá áherslur sem breytast alltaf."

Rúnar er hluti af frægum 1969 árgangi sem var mjög sigursæll í yngri flokkum. Flokkurinn var undir mikilli pressu í upphafi 10. áratugarins að landa Íslandsmeistaratitlinum en án árangurs.

„Það eru margir úr mínum árgangi sem unnu titilinn síðar en þá var ég fjarri góðu gamni. Ég hef aldrei unnið Íslandsmeistaratitilinn. Ég hef mikinn metnað til að gera það. Allir leikmenn KR vilja vinna titilinn í sumar líkt og stuðningsmennirnir. Það er markmið KR á hverju einasta tímabili þó það lukkist ekki alltaf. Nú erum við með gott lið, það gengur vel en mótið er bara hálfnað.

Við eigum mikið verk fyrir höndum og marga erfiða leiki. Við erum ekki búnir að vinna neitt ennþá. Ef við ætlum að fara að trúa því að við séum búnir að vinna eitthvað núna erum við á vitlausri leið. Við þurfum að halda okkur á jörðinni og halda áfram að hlaupa og berjast eins og hingað til. Það hefur skapað okkur þessa stöðu í deildinni," sagði Rúnar.