Bjarni Guðjóns: Leikurinn á fimmtudaginn í uppnámi

Bjarni Guðjónsson fyrirliði KR meiddist á nára í 4-0 sigurleiknum gegn Breiðablik í gærkvöld. Bjarni fór til sjúkraþjálfara í dag og segir Evrópuleikinn gegn Dinamo Tbilisi á fimmtudaginn í uppnámi hvað meiðsli hans varðar.

Bjarni var nýkominn úr sjúkraþjálfun þegar undirritaður heyrði í honum hljóðið.

„Leikurinn á fimmtudaginn er aðeins í uppnámi og ég veit ekki með sunnudaginn. Ég ætla að reyna að ná leiknum á fimmtudaginn og verð í mikilli sjúkraþjálfun þangað til. Vonandi verður þetta í lagi," sagði fyrirliði KR-inga.

KR-ingar mæta Dinamo Tbilisi í 3. umferð forkeppni Evrópudeildar á fimmtudaginn á KR-vellinum. Á sunnudaginn fljúga KR-ingar vestur á Ísafjörð þar sem BÍ/Bolungarvík er andstæðingurinn með Guðjón nokkurn Þórðarson í brúnni.

Bjarni segir meiðslin ný af nálinni. Hann hafi ekki fundið fyrir þeim áður.

„Nei, alls ekki. Fann hvorki fyrir þessu fyrir leikinn né í leiknum," sagði Bjarni sem tók undir með fréttamanni að meiðslin væru glæný og hundleiðinleg.