Þjálfari Víkings Ólafsvíkur úrskurðaður í þriggja leikja bann

Ejub Purisevic þjálfari Víkings í Ólafsvík hefur verið úrskurðaður í þriggja leikja bann fyrir framkomu sína og brottvísun í 2-2 jafnteflinu gegn Fjölni á föstudaginn.

Andri Ólafsson leikmaður ÍBV og Tómas Þorsteinsson í Fylki missa af næstu leikjum félaga sinna vegna fjögurra áminninga. Sömu sögu er að segja af Hauki Páli Sigurðssyni úr Val og Pétri Viðarssyni úr FH sem eru komnir í eins leiks bann.

Keflvíkingurinn Andri Steinn Birgisson hefur verið iðinn við kolann í spjaldasöfnun í sumar. Hann hefur nú þegar tekið út eins leiks bann fyrir fjórar áminningar og framundan er annað leikbann vegna sex uppsafnaðra gulra spjald.

Víkingur Ólafsvík var sektað um 10 þúsund krónur vegna framkomu Ejub Purisevic og reyndar 6000 krónur til viðbótar vegna uppsafnaðra refsistiga.

Aga- og úrskurðarnefnd KSÍ kemur saman á þriðjudögum og í gær voru nýjustu úrskurðir nefndarinnar birtir. Aðra úrskurði má sjá hér.