Enn einn Skotinn til Grindavíkur - ekki séð hann spila

Skoski miðjumaðurinn Derek Young hefur gengið til liðs við Grindavík. Þorsteinn Gunnarsson formaður knattspyrnudeildar segir að Grindvíkingar renni að vissu leyti blint í sjóinn hvað Young varðar. Robbie Winters, framherji þeirra, gefi honum þó topp meðmæli.

Grindvíkingar kunna greinilega vel við skoska knattspyrnumenn. Fyrir í liði Grindavíkur eru Skotarnir Jamie McCunnie, Scott Ramsay, Paul McShane og Robbie Winters.

„Robbie Winters benti okkur á hann. Hann var að líta í kringum sig og stökk á tækifærið að koma til Íslands. Hann kemur til landsins á morgun og mætir á æfingu á sunnudaginn," sagði Þorsteinn.

Young var á mála hjá Aberdeen frá árinu 2007 en Craig Brown knattspyrnustjóri félagsins ákvað að semja ekki við hann þegar samningur hans rann út í vor.

„Robbie gefur honum toppmeðmæli og þekkir hann mjög vel. við teljum hann vera týpuna sem við vorum að leita að. Djúpur miðjumaður og baráttumaður á miðjuna sem okkur vantaði," sagði Þorsteinn.

Young er annar leikmaðurinn sem kemur til Grindvíkinga í glugganum. Fyrr í dag var fjallað um félagaskipti Hauks Inga Guðnasonar til Grindavíkur. Þá er Frakkinn Yacine Si Salem haldinn til síns heima en hann þótti ekki standa undir væntingum.