Amnesty vill að stríðsglæpadómstóllinn rannsaki Sýrlendinga

Mannréttindasamtökin Amnesty International segja stjórnvöld í Sýrlandi mögulega sek um glæpi gegn mannkyni. Þetta kemur fram í nýrri skýrslu sem samtökin sendu frá sér í dag.

Í skýrslunni hvetja samtökin öryggisráð Sameinuðu Þjóðanna til þess að fara fram á að ríkisstjórn Bashars al-assads forseta verði rannsökuð af Alþjóðastríðsglæpadómstólnum í Haag. Í skýrslunni er gerð grein fyrir því hvernig öryggissveitir stjórnarinnar hneppi fólk í varðhald af handahófi, beiti grófum pyntingum og þá segir að minnsta kosti níu manns hafi látist af völdum pyntinga í varðhaldi í bænum Tal Kalakh sem var eitt af höfuð vígjum mótmælenda í landinu.

Amnesty hefur ekki frekar en flestir fjölmiðlar heimsins, fengið að koma inn í Sýrland frá því átök stjórnar og mótmælenda hófust, en skýrslan er skrifuð með því að ræða við flóttamenn frá Líbanon sem hafa komist við illan leik frá Sýrlandi síðustu vikurnar.