Umfjöllun: Breiðablik vann kærkominn sigur á Keflavík

Íslandsmeistarar Breiðabliks náðu að innbyrða kærkominn sigur, 2-1, gegn Keflvíkingum á Kópavogsvelli í kvöld. Kristinn Steindórsson, leikmaður Breiðabliks, var frábær fyrir heimamenn og gerði bæði mörk Blika í leiknum.

Heimamenn hófu leikinn vel og voru virkilega ákveðnir í öllum sínum aðgerðum. Blikar fóru stíft upp kantana og nokkur hættuleg færi komu útfrá því.

Keflvíkingar voru samt einnig skeinuhættir og létu byrjun Blika ekki trufla þeirra skipulag, en fyrsta mark leiksins kom eftir tuttugu mínútna leik þegar Hilmar Geir Eiðsson kom gestunum yfir með fínu marki.

Guðmundur Steinarsson, leikmaður Keflvíkinga, skallaði boltann inn fyrir vörn Blika þar sem Hilmar Geir var einn á auðum sjó. Eftirleikurinn auðveldur fyrir Hilmar sem afgreiddi boltann vel framhjá Ómari Jóhannssyni, markverði Keflvíkinga.

Eftir mark Keflvíkinga hresstust bæði lið mikið og sóttu sem aldrei fyrr að marki andstæðingsins. Keflvíkingar fengu nokkur tækifæri til þess að komast í 2-0 en náði ekki að nýta sér þau tækifæri. Það voru síðan Blikar sem náðu að jafna metin á markamínútunni frægu - þeirri 43.

Dylan Macallister, framherji Blika, fékk boltann á vinstri kanti, sendi frábæra fyrirgjöf á Kristinn Steindórsson sem afgreiddi knöttinn í netið. Staðan því 1-1 í hálfleik sem verður að teljast nokkuð sanngjörn staða.

Blikar byrjuðu síðari hálfleikinn vel og voru ákveðnir í öllum sínum aðgerðum á meðan Keflvíkingar áttu erfitt með að skapa sér hættuleg færi.

Kristinn Steindórsson kórónaði frábæran leik sinn með því að skora annað mark heimamanna á 64. mínútu leiksins og koma heimamönnum yfir, en hann fékk laglega sendingu inn fyrir vörn Keflvíkinga frá Macalisster og afgreiðslan var frábær hjá þessum snjalla framherja.

Kristinn hefur nú gert átta mörk í Pepsi-deild karla í sumar og er langmarkahæstur það sem af er móti. Keflvíkingar reyndu eins og þeir gátu það sem eftir lifði leiks en það gekk erfilega að skapa hættuleg færi, en úrslitasendingar geiguðu oft á tíðum þegar liðið var komið í ákjósanlegt tækifæri.

Virkilega mikilvægur sigur fyrir Breiðablik sem fengu heldur betur kalda vatnsgusu í andlitið gegn BÍ/Bolungarvík í Valitor-bikarnum í síðustu viku. Blikar eru því komnir með 11 stig í sjöunda sæti deildarinnar en Keflvíkingar eru enn með 8 stig sæti neðar.

Dómari: Örvar Sær Gíslason (5)

Skot (á mark): 8 – 8 (5-5)

Varin skot: Sigmar 4 – 3 Ómar

Horn: 5 – 5

Aukaspyrnur fengnar: 10 – 20

Rangstöður: 2-5