Owen verður áfram hjá United

Michael Owen verður áfram hjá Manchester United en hann hefur gert nýjan samning til félagið sem gildir til loka næsta tímabils.

Þetta kann að koma einhverjum á óvart en talið var líklegt að hann myndi fara frá félaginu nú í sumar. Annað hefur komið á daginn en Owen sjálfur sagðist sjálfur á dögunum vilja vera áfram.

Owen var í byrjunarliði United aðeins einu sinni í ensku úrvalsdeildinni í vetur en hann á í harðri samkeppni um stöður í byrjunarliðinu. Hún verður væntanlega enn harðari á næsta tímabili þar sem að Danny Welbeck mun snúa aftur til United í sumar eftir að hafa verið í láni hjá Sunderland.

„Michael hefur sannað að hann er knattspyrnumaður í fremsta flokki. Það var óheppilegt hvað hann fékk fá tækifæri en hann hefur þurft að standa í skugga Chicharito (Javier Hernandez) sem hefur staðið sig mjög vel,“ sagði Alex Ferguson, stjóri United, við enska fjölmiðla.

„Ég er mjög ánægður með að Michael verður áfram með okkur á næsta tímabili og mun líta til þess að gefa honum fleiri tækifæri þá.“