Umfjöllun: Nýliðar Þórs unnu Framara í Laugardalnum

Þórsarar fögnuðu fyrstu stigum sínum í Pepsi-deild karla í knattspyrnu í dag þegar þeir lögðu Fram að velli með einu marki gegn engu í Laugardalnum.

Óhætt er að segja að Þórsarar hafi stolið stigunum þremur því Framarar voru mun meira með boltann og sköpuðu sér fleiri færi. Barátta Þórsara sem voru tilbúnir að „deyja fyrir klúbbinn" skilaði sér þó í þremur stigum á meðan Framarar eru stigalausir að loknum tveimur umferðum.

Það var fátt um fína drætti í leiknum í dag. Framan af leik var lítið um færi og hreint yfir afar lítið um að vera. Almarr Ormarsson átti þokkalegt skot af 25 metra færi sem Srdjan Rajkovic varði auðveldlega og hinum megin komst Sveinn Elías Jónsson í þokkalegt færi en skotið af varnarmanni í hornspyrnu. Það var einmitt upp úr hornspyrnu sem fyrsta og eina mark leiksins kom.

Atli Sigurjónsson tók þá hornspyrnu frá vinstri inn á teiginn þar sem Slóveninn Janez Vrenko var á auðum sjó rétt fyrir utan markteig og stangaði knöttinn í netið óverjandi fyrir Ögmund í marki Fram. Fyrsta mark Þórsara í efstu deild síðan 2002 en ótrúlegt að Vrenko hafi verið einn og óvaldaður svo nærri marki. Framarar hresstust aðeins í kjölfar marksins og Halldór Hermann Jónsson átti hörkuskot sem Rajkovic gerði vel í að verja. Þórsarar því marki yfir þegar gengið var til leikhlés.

Síðari hálfleikurinn var eign Framara og greinilegt að Þórsarar ætluðu að halda fengnum hlut. Arnar Gunnlaugsson var færður í stöðu fremsta manns í stað Englendingsins Mark Redshaw sem hafði átt í miklu basli í fyrri hálfleiknum og var tekinn útaf í hálfleik fyrir Andra Júlíusson. Þrátt fyrir að Framarar héldu boltanum vel og kæmust ítrekað í góða stöðu til þess að senda fyrir náðu þeir ekki að skapa sér mörg dauðafæri. Alltaf voru baráttuglaðir Þórsarar fyrri til boltans.

Bestu færi Framara í hálfleiknum fengu miðverðirnir Kristján Hauksson og Jón Guðni Fjóluson. Um miðjan hálfleikinn féll boltinn fyrir fætur Kristjáns eftir aukaspyrnu en fyrirliðinn sneiddi boltann í slánna og yfir. Skömmu fyrir leikslok átti svo Jón Guðni fallega aukaspyrnu rétt utan teigs sem small í þverslánni sem betur fer fyrir Rajkovic markvörð Þórsara sem stóð frosinn á línunni.

Rajkovic virkaði mjög óöruggur í aðgerðum sínum í marki Þórs í dag og ótrúlegt að Framarar hafi ekki náð að nýta sér það til þess að pota inn marki. Það sem eftir lifði leiks reyndu Framarar árangurslaust að finna glufur á vörn Þórs sem hentu sér fyrir hvern einasta bolta ákveðnir í að taka stigin með sér heim í rútunni í þetta skiptið.

Þórsarar fögnuðu stigunum þremur vel og innilega í leikslok en Framarar gengu af velli daprir í bragði. Vert er að minnast á Mjölnismenn, stuðningsmenn Þórsara, sem halda áfram að vekja athygli. Þeir kaffærðu áhangendum Framara í stúkunni og nutu góðs af strákum úr 5. flokki Þórs sem voru í höfuðborginni í æfingaferð um helgina.

Fram–Þór Akureyri 0-1 - tölfræðin í leiknum0-1 Janez Vrenko (30.)

Laugardalsvöllur.

Áhorfendur: 1037

Dómari: Kristinn Jakobsson 8

Skot (á mark): 10–5 (2-4)

Varin skot: Ögmundur 3 – Rajkovic 2

Hornspyrnur: 12–7

Aukaspyrnur fengnar: 16–5

Rangstöður: 1–2

Fram (4-3-3)

Ögmundur Kristinsson 5

Daði Guðmundsson 5

Kristján Hauksson 5

Jón Guðni Fjóluson 6

Sam Tillen 5

Halldór Hermann Jónsson 5

Jón Gunnar Eysteinsson 4

(75., Guðmundur Magnússon -)

Kristinn Ingi Halldórsson 4

(64., Tómas Leifsson 4)

Arnar Bergmann Gunnlaugsson 6

Almarr Ormarsson 5

Mark Redshaw 3

(46., Andri Júlíusson 5)

Þór Akureyri (4-3-3)

Srdjan Rajkovic 4

Gísli Páll Helgason 5

Atli Jens Albertsson 6

Þorsteinn Ingason 6

Alexander Linta 5

(68., Ingi Freyr Hilmarsson 5)

Janes Vrenko 7 - maður leiksins

Gunnar Már Guðmundsson 5

Atli Sigurjónsson 5

Sigurður Marínó Kristjánsson 6

(86., Baldvin Ólafsson-)

Sveinn Elías Jónsson 5

(72., Ármann Pétur Sævarsson 5)

Jóhann Helgi Hannesson 5