Eltihrelli Rios hent í steininn til verndar Rio og fjölskyldu

Dómarinn í máli Rio Ferdinand gegn eltihrellinum Susanne Ibru ákvað í dag að stinga Ibru í steininn á meðan hann ákveður hvaða dóm hún skuli fá fyrir að hrella Rio og fjölskyldu.

Dómarinn sagði þetta nauðsynlegt til þess að tryggja öryggi fjölskyldunnar. Hann hefur þegar dæmt Ibru seka í málinu.

Hún tók þessari ákvörðun dómarans afar illa og öskraði að honum, er hún var leidd úr salnum, að hann þyrfti að láta skoða hausinn á sér.

Ibru hefur þegar gefið í skyn að hún muni ekki láta Rio vera og trúir því staðfastlega að hún sé rétta konan fyrir varnarmanninn.

"Við höfum þekkst lengi og ég er konan fyrir hann. Hann veit að ég hef ekki verið að hrella hann og veit líka að ég myndi aldrei meiða hann," sagði Ibru sem trúir því ekki að Rio sé giftur.

Hennar bíður að minnsta kosti nálgunarbann. Brjóti hún það bíður grjótið eftir henni.