Wilshere: Arsenal á mitt hjarta

Jack Wilshere, miðjumaður Arsenal og enska landsliðsins, gefur lítið fyrir þær fréttir að hann sé á leiðinni til Manchester City í sumar. Þessi 19 ára strákur hefur slegið í gegn á Emirates á þessu tímabili og er orðinn byrjunarliðsmaður í enska landsliðinu.

Enskir fjölmiðlar voru að slúðra um það í gær að Manchester City ætlaði að kaupa Wilshere fyrir 40 milljónir punda í sumar. Wilshere taldi sig því tilneyddan til þess að tjá sig um fréttirnar á twitter-síðu sinni.

„Fólk er að spyrja mig hvort að ég sé á leiðinni til City. Ég kyssi ekki Arsenal-merkið og fer síðan. Arsenal á mitt hjarta," skrifaði Wilshere.

Wilshere yrði samt ekki fyrsti leikmaðurinn sem færi frá Arsenal til Manchetser City en bæði Kolo Toure og Emmanuel Adebayor fóru þessa leið fyrir nokkrum árum.