Tíu stiga forskot hjá Man. Utd - Eiður spilaði í 35 mínútur

Manchester United náði í dag tíu stiga forskoti í ensku úrvalsdeildinni í knattspyrnu er liðið vann auðveldan sigur á Fulham, 2-0, á Old Trafford. United hefur engu að síður leikið tveimur leikjum meira en Arsenal en Lundúnaliðið þarf að vinna báða sína leiki til þess að minnka muninn aftur í fjögur stig.

United hafði mikla yfirburði í leiknum í dag frá upphafi. Berbatov kom United yfir með skoti af stuttu færi eftir sendingu Nani. Einhver áhöld voru um hvort Berbatov hefði verið rangstæður en markið stóð.

Antonio Valencia skoraði síðan sitt fyrsta mark fyrir United síðan hann fótbrotnaði illa á síðasta ári. Hann skallaði þá boltann í netið af afar stuttu færi.

Fulham sótti lítið sem ekkert í leiknum og til þess að hressa upp á sóknarleik liðsins setti Mark Hughes, stjóri Fulham, Eið Smára inn á 56. mínútu. Svo mikinn tíma hefur Eiður ekki fengið í ensku deildinni í vetur.

Eiður kom með talsverðan kraft í sóknarleik liðsins og hann átti skot rétt fram hjá marki United aðeins fimm mínútum eftir að hann kom af bekknum.

Eftir skot Eiðs var allur vindur úr leikmönnum Fulham og United landaði auðveldum þremur stigum.

Chelsea hoppaði síðan upp í þriðja sætið með sigri á Wigan sem var allt annað en auðveldur. Líflegasti fyrri hálfleikur dagsins var aftur á móti viðureign Spurs og Stoke.

Þar voru skoruð fimm mörk í fyrri hálfleik en ekkert í þeim síðari. Spurs fékk þó öll stigin.

Úrslit dagsins:

Blackburn-Birmingham  1-1

0-1 Lee Bowyer (31.), 1-1 David Hoilett (45.)

Bolton-West Ham  3-0

1-0 Daniel Sturridge (13.), 2-0 Lee Chung-Yong (20.), 3-0 Daniel Sturridge (50.)

Chelsea-Wigan  1-0

1-0 Florent Malouda (67.)

Man. Utd-Fulham  2-0

1-0 Dimitar Berbatov (12.), 2-0 Antonio Valencia (32.)

Sunderland-WBA  2-3

1-0 Nicky Shorey, sjm (9.), 1-1 Peter Odemwingie (28.), 2-1 Phillip Bardsley (31.), 2-2 Youssouf Mulunbu (53.), 2-3 Paul Scharner (71.)

Tottenham-Stoke City  3-2

1-0 Peter Crouch (11.), 2-0 Luka Modric (18.), 2-1 Matthew Etherington (26.), 3-1 Peter Crouch (33.), 3-2 Kenwyne Jones (41.)