Fyrstu frjálsu kosningarnar

Fyrstu frjálsu kosningarnar í Túnis fóru fram í gær og var kjörsóknin meiri en búist hafði verið við. Kosið var úr hópi 217 þingmanna um hverjir þeirra mynduðu nýja bráðabirgðaríkisstjórn og semdu í framhaldinu nýja stjórnarskrá fyrir landið.

Níu mánuðir eru liðnir síðan fyrrverandi forseta landsins, Zine El-Abidine Ben Ali, var steypt af stóli efir mánaðarlöng mótmæli vegna atvinnuleysis, spillingar og harðstjórnar. Sú lýðræðisbylting dreifðist síðan til annarra arabalanda, svo sem Egyptalands og Líbíu. Þetta eru einmitt fyrstu kosningarnar sem fara fram í arabalöndum eftir byltinguna.

Sjö og hálf milljón Túnisbúa er á kosningaaldri en aðeins tæpar fjórar og hálf milljón á kjörskrá, eða undir sextíu prósentum landsmanna. Áttatíu stjórnmálaflokkar eru í framboði en talið er að flokkur íslamista, Ennhada, fái flest atkvæði. Biðraðir voru langar í gær en fólk lét það ekki á sig fá. „Þetta er sögulegur dagur, sem ber að gleðjast yfir og fagna. Þótt ég þurfi að bíða í sólahring eftir því að fá að kjósa vil ég fyrir enga muni missa af þessari frelsistilfinningu,“ sagði Touhami Sakouhi, fyrrverandi pólitískur fangi í Túnis, á kosningastað. - fb