Taarabt dreymir enn um PSG

Adel Taarabt, leikmaður QPR, virðist hugsa um lítið annað að komast frá QPR. Þá helst vill hann komast til PSG í Frakklandi og vonast leikmaðurinn eftir því að franska liðið geri tilboð í janúar.

PSG var mjög spennt fyrir því að kaupa Taarabt en yfirmaður íþróttamála hjá félaginu, Leonardo, hefur áhyggjur af skapinu í leikmanninum.

"Hann hefur áhyggjur af skapinu í mér en honum var tjáð af mönnum hjá QPR að hann yrði að stýra mér. Þeim hefði tekist það er við unnum okkur sæti í úrvalsdeildinni," sagði Taarabt.

"Þetta er samt bara afsökun hjá Leonardo því hann vildi frekar semja við aðra leikmenn á undan mér. Hann vildi kaupa Jeremy Menez, Javier Pastore og vildi jafnvel fá Ganso. Ég veit því að ég verð að standa mig og þá kviknar aftur áhugi hjá félaginu."