Matthías fékk sjö mínútur í tapi Colchester

Matthías Vilhjálmsson kom inn á sem varamaður á 83. mínútu þegar Colchester tapaði 0-2 á útivelli á móti toppliði Brighton í ensku C-deildinni í kvöld en Matthías er á láni frá FH.

Inigo Calderon og Craig Noone skoruðu mörk heimaliðsins í uppbótartíma fyrri hálfleiks og á 76. mínútu leiksins. Matthías kom inn á sem varamaður sjö mínútum eftir að Colchester-liðið lenti 2-0 undir.

Það batnaði ekki ástandið hjá þegar varnarmaðurinn Pat Baldwin fékk sitt annað gula spjald á lokamínútunum.

Colchester er í 11. sæti deildarinnar fjórum stigum frá sjötta sætinu sem gefur sæti í úrslitakeppninni en Brighton náði með þessum sigri sex stiga forskoti á toppnum.