Nú er Mario Balotelli líka að deyja úr heimþrá

Roberto Mancini, stjóri Manchester City, er áfram í vandræðum með framherja sína því eins og Carlos Tevez þá er Mario Balotelli víst líka að deyja úr heimþrá. Balotelli hefur ekki náð að aðlagast vel enska boltanum síðan að hann kom til City frá Inter Milan. Þetta kemur fram í frétt hjá Guardian.

Mario Balotelli saknar Ítalíu og sér víst eftir því að haga komið til Englands. Þetta hefur verið vonbrigðatímabil hjá stráknum þar sem hann hefur verið mikið meiddur og hefur einnig mátt þola heilmikla gagnrýni fyrir frammistöðu sína. Balotelli hefur skorað 5 mörk í 9 leikjum með Manchester City liðinu á tímabilinu.

Balotelli er tvítugur og gerði fimm ára samning við City. Honum gengur víst illa að eignast vini innan liðsins og enskir fjölmiðlar hafa það eftir vinum hans að honum líði illa í Englandi og sjái enga framtíð fyrir sig þar.

Balotelli á þó einhverja vini í Manchester og einn af þeim er Andrea, sonur Roberto Mancini.

Þá vakti það líka athygli á dögunum þegar hann mætti á æfingu í Lamborghini í láni frá El Hadji Diouf leikmanni Blackburn Rovers.

Mancini hefur leyst málið tímabundið með því að leyfa stráknum að fljúga til Ítalíu þegar tækifæri gefst til þess.

Balotelli hefur einnig verið orðaður við AC Milan í fjölmiðlum en það fór víst aldrei vel í stuðningsmenn Inter Milan þegar hann var þar að Balotelli var mikill stuðningsmaður AC Milan í æsku.