Stjórnarmenn Newcastle vildu selja Carroll

Dennis Wise, fyrrum yfirmaður knattspyrnumála hjá Newcastle, segist hafa barist fyrir því að halda sóknarmanninum Andy Carroll hjá félaginu á sínum tíma.

Wise var hjá Newcastle í rúmlega ár en yfirgaf það í apríl 2009. „Við fengum tilboð. Ég svaraði því neitandi og sagði strákinn vera framtíð liðsins. Sumir stjórnarmenn voru mér sammála en aðrir ekki," segir Wise.

„Þarna munaði litlu að Carroll yrði seldur en í staðinn fékk ég hann til að skrifa undir nýjan samning."

Wise neitar því að hafa keypt úrúgvæska leikmanninn Ignacio Gonzalez til félagsins. Kevin Keegan, þáverandi knattspyrnustjóri Newcastle, sagði í viðtali að leikmanninum hafi verið þröngvað upp á hann.