Peter Crouch vill vera hjá Tottenham út ferilinn

Sóknarmaðurinn Peter Crouch vill vera með Tottenham út ferilinn. Hann hóf feril sinn hjá félaginu en var seldur til Queens Park Rangers áður en hann hafði leikið með aðalliði félagsins.

Í fyrra kom hann svo aftur til Tottenham eftir að hafa leikið með Portsmouth, Aston Villa, Norwich, Southampton og Liverpool á ferli sínum.

Crouch fær mikið að spila hjá Tottenham og hefur verið sérlega heitur í Meistaradeildarævintýri liðsins.

„Ég er verulega ánægður hér og vill vera hér út ferilinn," sagði Crouch við The People. „Ég er að finna mig vel hjá þessu félagi og við getum afrekað svo margt á komandi árum. Ég vil vera hér út ferilinn nema að mér verði sparkað!"

Crouch, sem er 29 ára, hefur verið heppinn með meiðsli á ferli sínum og segist eiga mörg ár eftir enn.