Öruggt hjá United - Tevez bjargaði City

Manchester United er sem fyrr á toppi ensku úrvalsdeildarinnar í knattspyrnu eftir afar sannfærandi sigur á Sunderland. Lokatölur 2-0 en United hefði átt að vinna leikinn með mun meiri mun.

Sunderland ógnaði marki United aldrei af neinu viti og mátti þakka fyrir að vera aðeins 1-0 undir í leikhléi enda óðu leikmenn United í færum.

Það var Dimitar Berbatov sem skoraði bæði mörk United í dag. Hið fyrra með skalla eftir sendingu frá Rooney. Smá heppnisstimpill var á síðara markinu sem var táarskot sem fór í Anton Ferdinand, breytti um stefnu og þaðan í netið.

Man. City byrjaði leikinn gegn Newcastle með ævintýralegum látum og var 0-2 yfir eftir aðeins fjórar mínútur.

Newcastle kom til baka í síðari hálfleik, minnkaði muninn og sótti stíft er Tevez skoraði þriðja markið og kláraði dæmið. Þriðja markið var heppnismark líkt og hjá Berbatov. Fór í varnarmann og þaðan í netið.

Eiður Smári Guðjohnsen fékk sem fyrr ekkert að spila fyrir Stoke sem vann góðan útisigur á Blackburn. Grétar Rafn Steinsson var aftur á móti í byrjunarliði Bolton í dag.

Úrslit dagsins:

Blackburn-Stoke City 0-2

0-1 Robert Huth (51.), 0-2 Marc Wilson (90.)

Bolton-WBA 2-0

1-0 Matthew Taylor (40.), 2-0 Johan Elmander (85.).

Man. Utd-Sunderland 2-0

1-0 Dimitar Berbatov (5.), 2-0 Dimitar Berbatov (56.)

Newcastle-Man. City 1-3

0-1 Gareth Barry (2.), 0-2 Carlos Tevez (4.), 1-2 Andy Carroll (72.), 1-3 Carlos Tevez (80.)

Wolves-Wigan 1-2

0-1 Hugo Rodallega (8.), 0-2 Tom Cleverley (20.), 1-2 Steven Fletcher (87.)