Innlent

Hitti fjóra ráðherra vegna ríkisábyrgðar

Frá fundi ríkisráðs 31. desember. Síðan þá hefur forseti fundað með fjórum ráðherrum.
Frá fundi ríkisráðs 31. desember. Síðan þá hefur forseti fundað með fjórum ráðherrum. Mynd/Daníel Rúnarsson

Ólafur Ragnar Grímsson tilkynnir um ákvörðun sína varðandi lög um ríkis­ábyrgð vegna Icesave á Bessastöðum klukkan 11 í dag. Þá kemur í ljós hvort hann staðfestir lögin eða synjar.

Lögin voru samþykkt 30. desember og afhent forsetanum til undirritunar á gamlársdag. Þá tilkynnti hann að hann tæki sér umþóttunartíma vegna málsins. Á laugardag hitti hann fulltrúa Indefence sem afhentu honum tugþúsund áskoranir um að vísa málinu til þjóðaratkvæðagreiðslu.

Ólafur Ragnar fundaði á sunnudag einslega með fjórum ráðherrum; þeim Jóhönnu Sigurðardóttur forsætisráðherra, Steingrími J. Sigfússyni fjármálaráðherra, Össuri Skarphéðinssyni utanríkisráðherra og Gylfa Þ. Magnússyni, efnahags- og viðskiptaráðherra.

Þá hefur Fréttablaðið heimildir fyrir því að á mánudag hafi hann rætt símleiðis við Má Guðmundsson seðlabankastjóra, og fleiri sérfræðinga, um efnahagslegar afleiðingar þess að synja frumvarpinu staðfestingar.

Forsetinn ræddi ekki við forystumenn stjórnarandstöðunnar og hafði ekki samband við Franek Roswadowski, fulltrúa Alþjóðagjaldeyrissjóðsins á Íslandi.

Forystumenn Alþýðusambands Íslands, Bandalags starfsmanna ríkis og bæja, Samtaka atvinnulífs og Samtaka iðnaðarins hvetja allir forsetann til að staðfesta frumvarpið hið fyrsta.

Óvíst er hvað gerist staðfesti Ólafur Ragnar ekki lögin. Engin lög eru til um framkvæmd þjóðaratkvæðagreiðslu.

- kóp, bþs, bj /


Tengdar fréttir

Brýnt að skerpa á ákvæði um þjóðaratkvæði

Björg Thorarensen, forseti lagadeildar Háskóla Íslands, segir brýnt að skerpa á ákvæði stjórnarskrárinnar um þjóðaratkvæðagreiðslur. Margir þættir séu afar óljósir. Aldrei hafi reynt á 26. grein stjórnarskrárinnar þar sem kveðið er á um þjóðaratkvæði. Ekki liggi ljóst fyrir hverjir geti kallað eftir þjóðaratkvæðagreiðslum né hvort niðurstaða þeirra sé ráðgefandi eða bindandi.

Ráðgjafi forsetans vill að hann staðfesti lögin

Sigurður G. Guðjónsson, einn helsti ráðgjafi Ólafs Ragnars Grímssonar í gegnum tíðina, vill að hann staðfesti Icesave lögin sem Alþingi samþykkti 30. desember. Sigurður segist ekki hafa rætt um málið við Ólaf.

Forseti hefur rætt við forystumenn stjórnarflokkanna

Ólafur Ragnar Grímsson forseti Íslands fundaði í gær með Jóhönnu Sigurðardóttir forsætisráðherra og Steingrími J. Sigfússyni fjármálaráðherra í sitt hvoru lagi vegna Icesave laganna.

Erlendir fréttamenn á leiðinni vegna Icesave

Fjármálaráðherra Bretlands segir afar mikilvægt að forseti Íslands staðfesti Icesave lögin, þótt hann geri sér grein fyrir að málið sé Íslendingum erfitt. Ekki liggur fyrir hvenær forsetinn ákveður sig, en alveg eins má búast við að það gerist í dag. Áhugi erlendis er mikill á málinu en fréttastofu er kunnugt um að erlendir fréttamenn séu á leiðinni til landsins til þess að fjalla um málið.

Forsetinn hefur ákveðið sig

Forseti Íslands hefur ákveðið hvort hann staðfestir eða synjar Icesave lögunum staðfestingar og greinir frá þeirri ákvörðun í fyrramálið. Töluverðar líkur eru á að ríkisstjórnin segi af sér og boðað verði til kosninga, synji forsetinn því að staðfesta lögin.

Synjun gæti valdið pólitískri upplausn

Taki forseti Íslands sér lengri umþóttunartíma en til dagsins í dag vegna Icesave-laganna kann hann að mati Eiríks Tómassonar lagaprófessors að vera brotlegur við stjórnarskrá.

Ólafur boðar til blaðamannafundar

Ólafur Ragnar Grímsson, forseti Íslands, hefur boðað til blaðamannafundar á Bessastöðum á morgun klukkan 11. Óvissa hefur ríkt um hvað hvernig forsetinn mun bregðast við í Icesave málinu. Fjórir sólarhringar eru liðnir síðan að hann fékk lögin í hendurnar. Þá sagðist Ólafur ætla að taka sér frest til þess að fara yfir málið og í fyrradag tók hann á móti undirskriftum Indefence hópsins þar sem skorað er á hann að synja lögunum staðfestingar.

Mest lesið


Fleiri fréttir

Sjá meira


×

Mest lesið