Innlent

Gylfi Magnússon: Afsögn ekki rædd

Gylfi segir ekkert hafa verið minnst á hugsanlega afsögn sína á fundi sem hann átti í gærkvöld með formönnum stjórnarflokkanna.
Gylfi segir ekkert hafa verið minnst á hugsanlega afsögn sína á fundi sem hann átti í gærkvöld með formönnum stjórnarflokkanna. Mynd/Anton Brink
„Það er ekki minn skilningur heldur þvert á móti að starfsmenn ráðuneytisins hafi haldið frá mér upplýsingum eða blekkt mig. Ég var fyllilega upplýstur um það sem átti að upplýsa mig um," segir Gylfi Magnússon, efnahags- og viðskiptaráðherra, sem ræddi við Fréttablaðið í gærkvöld.

Gylfi segir ekkert hafa verið minnst á hugsanlega afsögn sína á fundi sem hann átti í gærkvöld með Jóhönnu Sigurðardóttur forsætisráðherra og Steingrími J. Sigfússyni fjármálaráðherra. Hann muni hins vegar áfram gera allt sem hann getur til að upplýsa frekar um þetta mál.

„Það var aldrei tilgangur minn að blekkja þingheim, en mér þykir leitt ef einhverjir hafa misskilið svar mitt og get auðvitað hæglega beðist velvirðingar á því. Það er hugsanlegt að einhverjir hafi skilið svarið þannig að ég væri að tala almennt um öll myntkörfulán, en það er þá bara ef menn sleppa seinni hlutanum í svari mínu."

Hann segist alls ekki hafa vísvitandi reynt að svara óljóst til að koma í veg fyrir að skapa illviðráðanlegt ástand. „Þetta voru engin ríkisleyndarmál og ég hafði sjálfur rætt þessi mál opinberlega um svipað leyti."

Samkvæmt upplýsingum úr viðskiptaráðuneytinu var ráðherranum munnlega greint frá áliti Lex líklega 25. júní 2009, og að það hefði verið unnið fyrir Seðlabankann. Sem þekkt er sagði í álitinu að gengistryggð krónulán væru ólögmæt. Jónína S. Lárusdóttir, fyrrverandi ráðuneytisstjóri, hafi því ekki haldið því leyndu fyrir ráðherra. Viðskiptaráðuneytið hafði áður greint frá því að Gylfi hafi séð minnisblað 24. júní, byggt á álitinu.

Gylfi sagðist í síðustu viku ekki hafa vitað af áliti Lex/Seðlabanka um gengistryggingu áður en hann svaraði því til á Alþingi í júlí, spurður um krónulán í erlendri mynt, að þau væru lögmæt.

Gylfi hefur kennt Seðlabankanum um að hafa ekki séð gögnin.

Áhrifamenn í Samfylkingunni, meðal annarra ráðherrar, sögðust í gær meta stöðu Gylfa sem mjög erfiða. Forsætisráðherra vildi ekki gefa kost á viðtali í gær, ekki fyrr en hún hefði heyrt skýringar Gylfa.

klemens@frettabladid.is

gudsteinn@frettabladid.is


Tengdar fréttir

Engin leynd yfir tölvupósti

Aðallögfræðingur Seðlabankans, Sigríður Logadóttir, segir að engin fyrirvari hafi verið gerður um notkun viðskiptaráðuneytisins á tölvupósti sem hún sendi lögfræðingi ráðuneytisins, en hann fjallaði um heimild til gengistryggingar lána og var endursögn á minnisblaði Sigríðar sama efnis.

Ræddu gagnrýni á Gylfa

Gylfi Magnússon efnahags- og viðskiptaráðherra og Jóhanna Sigurðardóttir forsætisráðherra ræddu saman í síma í kvöld um þá gagnrýni sem beinst

Traust Jóhönnu til Gylfa skilyrðum háð

Forsætisráðherra ber enn traust til viðskiptaráðherra, en traust hennar er því skilyrði háð að hann geti gefið greinargóðar skýringar á ásökunum sem settar hafa verið fram á hendur honum. Þingmenn Hreyfingarinnar ætla að leggja fram vantrauststillögu á hendur viðskiptaráðherra ef hann segir ekki af sér.

Gylfi brunar í bæinn

Gylfi Magnússon, efnahags- og viðskiptaráðherra, er á leiðinni í bæinn en hann hefur verið í sumarleyfi undanfarna daga og utan símasambands.

Skora á Gylfa að segja af sér

Þingmenn Hreyfingarinnar skora á Gylfa Magnússon, efnahags- og viðskiptaráðherra, að segja af sér.

Bjarni Ben: Gylfi getur ekki firrt sig ábyrgð

Formaður Sjálfstæðisflokksins segir að viðskiptaráðherra geti ekki firrt sig ábyrgð á því að ekki hafi verið gripið aðgerða vegna upplýsinga sem viðskiptaráðuneytið bjó yfir um ólögmæti gengistryggðra lána. Bjarni segir málið það alvarlegt að kalla verði Alþingi saman og þá telur hann að ríkisstjórnin eigi að víkja.

Gylfi situr áfram í embætti

Gylfi Magnússon viðskiptaráðherra mun sitja áfram í embætti, segir Benedikt Stefánsson, aðstoðarmaður hans, í samtali við Vísi.

Hefði átt að vita meira um málaflokkinn

Birgir Hermannsson stjórnmálafræðingur minnir á að ráðherra beri pólitíska ábyrgð á sínum málaflokki og því sem embættismenn undir honum vinna að. „Ef eitthvað fer úrskeiðis þá ber ráðherra ábyrgð gagnvart þinginu og verður að svara fyrir það,“ segir Birgir og nefnir sem dæmi að ef forveri Gylfa, Björgvin G. Sigurðsson, segðist ekki hafa vitað neitt í aðdraganda bankahrunsins, þá væri það engin afsökun.

Mest lesið


Fleiri fréttir

Sjá meira


×

Mest lesið