Engin leynd yfir tölvupósti

 Aðallögfræðingur Seðlabankans, Sigríður Logadóttir, segir að engin fyrirvari hafi verið gerður um notkun viðskiptaráðuneytisins á tölvupósti sem hún sendi lögfræðingi ráðuneytisins, en hann fjallaði um heimild til gengistryggingar lána og var endursögn á minnisblaði Sigríðar sama efnis.

Hins vegar hafi lögfræðiálit Lex um þetta ekki átt að fara víðar en til lögfræðings viðskiptaráðuneytisins, enda tíðkist ekki að utanaðkomandi álit sé notuð af öðrum en þeim sem pantar það. Bæði í minnisblaðinu og lögfræðiálitinu er reifað að bann sé við því að verðtryggja skuldbindingar í íslenskum krónum á grundvelli gengis erlendra gjaldmiðla. Þetta kom einnig fram í tölvupóstinum.

Gylfi Magnússon viðskiptaráðherra sagði um lögfræðiálitið á Rúv í gær að það væri „mjög óvenjulegt fyrirkomulag“ að Seðlabankinn hafi ákveðið „að upplýsa ekki ráðherra um þetta og afhenda lögfræðingi í viðskiptaráðuneytinu þetta með þessum formerkjum“. Sjálfur hafi hann ekki heyrt af því fyrr en síðsumars eða um haustið.

Arnór Sighvatsson, aðstoðarbankastjóri Seðlabankans, segir að hann og aðallögfræðingur hafi verið sammála um það á sínum tíma að senda álitið til viðskiptaráðuneytisins: „Það var aldrei ákveðið að upplýsa ekki. Það var ákveðið að upplýsa með þessum hætti.“

Jóhanna Sigurðardóttir forsætisráðherra sagði í gær óeðlilegt að upplýsingarnar hefðu ekki verið kynntar henni. Hún hefur óskað eftir skýringum bankans vegna þessa.

Seðlabankastjóri, Már Guðmundsson, segir að hann hafi ekki verið í bankanum á þessum tíma en muni kanna málið nánar og svara forsætisráðherra. - kóþ