Hafa ekki gefið upp vonina að finna fólk á lífi

Vonir eru bundnar við að fólk finnist enn á lífi í rústum húsa sem hrundu í jarðskjálftanum á Haítí í vikunni. Íslenska björgunarsveitin sem verið hefur að störfum í Port au Prince, höfuðborg landsins, síðustu tvo daga heldur áfram leit sinni í dag.

Rústabjörgunarmenn tala yfirleitt um að fyrstu 72 klukkutímarnir skipti sköpum í aðstæðum eins og Haítí. Þar eru nú rúmir 84 klukkutímar síðan skjálftinn reið yfir og tíminn því orðinn naumur ef fleira fólk á að finnast á lífi. Jákvæðu fréttirnar eru að vegna veðurfarsins á Haítí undanfarna daga og hvernig húsin hafa hrunið þá eru líkur á að fleira fólk gæti fundist á lífi en ella.

Gísli Rafn Ólafsson er íslensku rústabjörgunarsveitinni á Haítí. Hann rætti við fréttamann gegnum gervihnattasíma í morgun. Gísli segir að þegar að í mörgum tilfellum hafi orðið til holrými þegar byggingar féllu og að í þeim rýmum séu mögulega fólk sem hafi lokast inni.

„Við eigum alls ekki að gefa upp vonina að hér finnist fleiri," segir Gísli og bætir við að í gær hafi fundist á bilinu 20 til 30 manns í rústunum. Margir hverjir hafi ekki verið slasaðir heldur þurft á mat og drykk að halda.

Gísli segir ástandið erfitt á Haítí. En það horfi til betri vegar eftir því sem hjálparstarfið eflist. Hann segist ekki hafa orðið var við neinar óeirðir né gripdeildir. Þvert á móti finni hann fyrir miklum samhug og þakklæti jafnvel þó að hann hafi þurft að flytja fólki erfið tíðindi.

„Það er náttúrlega rosalega erfitt að fara á marga staði þar sem við sjáum að fólk hefur látist og þurfa að þurfa að skýra það út fyrir aðstandendum," segir Gísli.

Nýjustu fregnir herma að um 200 þúsund manns hafi látist í jarðskjálftanum eða af völdum hans. Hjálparstarfsmenn eru í kappi við tímann en erfiðlega hefur gengið að koma nauðsynjum til þeirra sem á þurfa að halda. Betra skipulag er hins vegar að komast á það starf með hverjum deginum.

Bæði Hillary Clinton utanríkisráðherra BNA og Ban-Ki Moon aðalritari Sameinuðu þjóðanna eru væntanleg til landsins í dag en Sameinuðu þjóðirnar ætla að safna hálfum milljarði dollara fyrir hjálparstarfið í landinu. Bandaríkjamenn ætla að senda 10 þúsund hermenn til Haíti en þeim er ætlað að tryggja öryggi í landinu sem er vægast sagt ótryggt þessa stundina.