Lennon skoraði sigurmarkið gegn Liverpool í uppbótartíma

Martin Skrtel skoraði fyrir bæði lið þegar Tottenham vann 2-1 sigur á Liverpool í lokaleik helgarinnar í ensku úrvalsdeildinni. Skemmtanagildi leiksins var feykilega hátt en Aaron Lennon skoraði sigurmark leiksins í uppbótartíma.

Rafael van der Vaart var í byrjunarliði Tottenham en hann gekk greinilega ekki heill til skógar og þurfti að fá skiptingu eftir tíu mínútur.

Liverpool var betra liðið í fyrri hálfleik og komst verðskuldað yfir á 42. mínútu þegar Skrtel náði að skora sitt annað mark í ensku úrvalsdeildinni.

Maxi Rodriguez og Fernando Torres misnotuðu báðir dauðafæri fyrir hálfleik en gestirnir hefðu vel getað verið þremur mörkum yfir þegar gengið var til búningsherbergja.

Snemma í seinni hálfleik fékk Torres annað dauðafæri til að skora fyrir Liverpool en var of lengi að athafna sig, Sebastien Bassong hljóp hann uppi í annað sinn í leiknum og bjargaði með frábærum varnarleik. Tottenham var svo nálægt því að jafna skömmu síðar en bjargað var á marklínu.

Dómarinn Martin Atkinson dæmdi svo hendi á David Ngog eftir aukaspyrnu. Hann var rétt fyrir innan teiginn og því vítaspyrna staðreynd. Varamaðurinn Jermain Defoe fór á punktinn en spyrna hans var hörmuleg og hann skaut framhjá.

Á 66. mínútu kom jöfnunarmarkið 1-1. Þá hljóp Luka Modric framhjá þremur varnarmönnum og renndi knettinum fyrir en Skrtel renndi sér í boltann og skoraði í eigið mark.

Bæði lið freistuðu þess að ná fram sigurmarki og Tottenham tókst að ná því í uppbótartíma leiksins. Paul Konchesky gerði sig sekan um slæm mistök, fór út úr stöðu og Aaron Lennon náði að skora með glæsilegri afgreiðslu.

Hann hefði svo getað bætt við öðru marki í blálokin en úrslitin 2-1 fyrir Tottenham sem er í fimmta sæti deildarinnar, sex stigum á eftir toppliði Manchester United. Liverpool situr í tíunda sætinu.