Barnaði dóttur sína fyrir nýju kærustuna

Breskur faðir er fyrir rétti sakaður um að hafa margnauðgað sextán ára gamalli dóttur sinni til þess að gera hana ófríska. Faðirinn og móðir telpunnar voru skilin og hann var kominn með nýja kærustu. Sú gat ekki eignast börn vegna aðgerðar sem hún hafði gengist undir. Faðirinn vildi því barna dóttur sína til þess að kærastan fengi barn til að hugsa um.

Stúlkan er nú 19 ára. Fyrir rétti sagði hún að faðir hennar hefði neytt hana til samfara á hverjum degi í meira en mánuð þartil hún varð ófrísk. Þegar barnið fæddist sagði stúlkan að kærasti hennar ætti það. Þau höfðu hinsvegar aldrei átt kynmök.

Stúlkan ákvað að leita til lögreglunnar þegar kærasta föðurins vildi annað barn og hann hugðist eignast það með fjórtán ára stúlku.