Óttast að Madeleine skyggi á Viktoríu systur sína

Tilkynnt var um það í dag að Madeleine svíaprinsessa væri hætt með kærastanum sínum, Jonas Bergstrom. Þetta þykir sæta nokkrum tíðindum enda hafði jafnvel verið búist við því að hjónaleysin myndu ganga upp að altarinu áður en langt um væri liðið.

En þrátt fyrir að Svíar hafi um eitthvað að tala næstu dagana, eftir að þessi tíðindi hafa verið kunngjörð, eru ekki allir ánægðir. Málið fær svo mikla athygli að nú óttast menn að ástarmál Madeleine muni skyggja á Viktoríu krónprinsessu, sem ætlar sannarlega að ganga upp að altarinu í sumar með sínum heittelskaða.

Madeleine hefur sjálft ákveðið að flýja fjölmiðlaumfjöllunina í heimalandinu til New York. Þar vonast hún til þess að geta jafnað sig á sambandsslitunum.

Það var DR sem greindi frá.