Náði ítölskum mafíuforingja

Lögreglan á Ítalíu handtók í gær 300 manns vegna gruns um aðild að morðum og skipulagðri glæpastarfsemi, að því er fram kom á vef breska ríkisútvarpsins, BBC.

Í hópi hinna handteknu var Domenico Oppedisano, meintur höfuðpaur Calabrian-fjölskyldunnar, sem er ein sú valdamesta innan ítölsku mafíunnar. Oppedisano er áttræður.

Auk hans var framkvæmdastjóri glæpafjölskyldunnar handtekinn í Mílanó, ásamt 160 öðrum, þar á meðal kaupsýslumenn og embættismenn úr heilbrigðisstétt.

Lögreglan lét til skarar skríða í kjölfar innbyrðis átaka í Calabrian-fjölskyldunni, eftir að norðurarmur glæpasamtakanna reyndi að ná völdum yfir þeim syðri.