Colchester vill fá Matthías að láni í janúar

Enska C-deildarliðið Colchester United hefur mikinn áhuga á því að fá fyrirliða bikarmeistara FH, Matthías Vilhjálmsson, að láni í janúar. Matthías fór til reynslu til félagsins í síðasta mánuði. Þetta kemur fram á BBC í dag.

„Þetta er svolítið snúið því þetta eru félagaskipti á milli landa og félagsskiptaglugginn er ekki opinn á sama tíma í þessum tveimur löndum. Þetta mun því taka því sinn tíma en við erum á fullu að vinna í þessu," sagði John Ward, stjóri Colchester United við BBC í dag.

Colchester United er í 6. sæti í ensku C-deildinni, sex stigum á eftir toppliði Brighton & Hove Albion. Liðið var í þriðja sæti fyrir stuttu en hefur aðeins náð að vinna einn af síðustu fjórum leikjum sínum.

Matthías er 23 ára sóknarmiðjumaður sem var með 6 mörk og 6 stoðsendingar í 21 leik með FH í Pepsi-deildinni síðasta sumar. Matthías skoraði líka fjögur bikarmörk í sumar þar af tvö þeirra í 4-0 sigri á KR í bikarúrslitaleiknum.