Neyðarlegt öryggismál: Hjón lugu sig inn í veislu í Hvíta húsinu

Hjónin Tareq og Michaele Salahi hafa valdið gífurlegum usla innan leyniþjónustu Bandaríkjanna og öryggisvarða Hvíta hússins eftir að þau komust óboðin inn í forsetaveislu Barack Obama til heiðurs indverska forsætisráðherranum.

Veislan var haldin á þriðjudaginn og voru gestir alls 300. Um var að ræða fínasta slekt Bandaríkjanna enda var veislan haldin til heiðurs Manmohan Singh, forsætisráðherra Indlands.

Meðal gesta í veislunni var Katie Couric, en hún kom rétt áður en parið svindlaði sér inn.

Hjónin Tareq og Michaele Salahi eru helst fræg í Bandaríkjunum fyrir að vera raunveruleikastjörnur. Michaele er í þættinum Real housewifes of Washington en hjónin hafa vakið athygli í þættinum fyrir að hafa hnakkrifist drukkinn.

Það kom ekki ljós fyrr en daginn eftir að hjónin höfðu verið í veislunni þar sem myndir birtust af þeim á Facebook síðu þeirra með ýmsum starfsmönnum Hvíta hússins og öðrum gestum.

Það var Washington Post sem greindi fyrst frá málinu sem þykir gríðarlega vandræðalegt fyrir Hvíta húsið þar sem öryggisgæsla á að vera með þeim öflugustu sem finna má í veröldinni. Yfirmaður öryggismála í Hvíta húsinu segir í viðtali við New York Post að engin raunveruleg hætta hefði verið á ferð því hjónin fóru í gegnum málmleitartæki eins og allir aðrir.

Hann sagði einnig að leyniþjónusta Bandaríkjanna (CIA) hefði verið látin vita af málinu og er þar til rannsóknar. Þá segir hann í viðtali að ekki sé fulljóst hvernig hjónunum tókst að komast inn en tók sérstaklega fram að þau hefðu ekki komist nálægt Obama né eiginkonu hans.