Meira brak fundið úr vél Air France

Meira brak sem talið er vera úr flugvél Air France sem hrapaði yfir Atlandshafi hefur fundist. Þar á meðal er um sjö metra langt stykki úr vélinni. Í gær hafði fundist meira brak sem talið er vera úr sömu vél.

Engu að síður eru rannsakendur ekki bjartsýnir á að finna hinn svokallaða svarta kassa vélarinnar.

Björgunarskip frá fjölmörgum löndum eru nú á siglingu í átt að svæðinu sem er um 640 kílómetrum norðaustur af Brazilíu.

Vélin fórst á leið sinni frá Rio de Janeiro í Brasilíu til Charles de Gaulle-flugvallarins í París. Vélin flaug inn í ókyrrðarsvæði áður en samband við hana rofnaði en klukkan 4:15 að frönskum tíma bárust flugstjórnarmönnum í París sjálfvirk skilaboð frá viðhaldstölvum þotunnar þar sem greint var frá því að einhver af kerfum hennar væru í ólagi og virkuðu ekki sem skyldi.