SÞ fordæma kjarorkutilraunir N-Kóreumanna

Öryggisráð Sameinuðu þjóðanna lýsri megnri andúð yfir kjarnorkutilraunum Norður-Kóregumanna og fordæmir þær. Ráðið kom saman til fundar í kvöld vegna kjarnorkutilrauna Norður-Kóreumanna og samþykkti ályktun einróma um málið. Öryggisráðið segir kjarnorkutilraunirnar brjóta á skýran hátt gegn fyrri ályktun ráðsins frá árinu 2006.

Fjölmörg ríki heims hafa fordæmt kjarnorkutilraun Norður-Kóreumanna síðustu og segir Barack Obama, Bandaríkjaforseti, hana ógn við frið og öryggi í heiminum. Norður-Kóreumenn segjast hins vegar vera að verja fullveldi sitt og tryggja frið á Kóreuskaganum.

Kjarnorkusprengja var sprengd neðanjarðar skömmu eftir miðnætti að íslenskum tíma. Í yfirlýsingu í norður-kóreska ríkissjónvarpinu í morgun var sagt að allt hefði gengið að óskum.

Stjórnvöld í Norður-Kóreu hafa ekki viljað upplýsa hvar sprengjan var sprengd en jarðmælingar Suður-Kóreumanna þykja sýna að það hafi verið í norðausturhluta landsins, nærri bænum Kilju. Þar var fyrsta tilraunasprenging Norður-Kóreumanna gerð í október 2006. Þá var sprengjan um eitt kílótonn að mati bandarískra sérfræðinga.

Til jafns við sprengjun sem varpað var á Nagasaki

Sprengjan í gær er talin hafa verið tuttugu sinnum öflugri og til jafns á við þá sem Bandaríkjamenn vörpuðu á japönsku borgina Nagasaki við lok seinna stríðs.

Younhap fréttastofan í Suður-Kóreu greindi frá því skömmu eftir kjarnorkutilraunina að Norður-Kóreumenn hefðu skotið þremur skammdrægum eldflaugum á loft í tilraunaskyni. Stjórnvöld í Pyongyang hafa ekki staðfest það.

Ísland hefur fordæmt kjarnorkutilraunina

Fjölmörg ríki heims, þar á meðal Ísland, hafa fordæmt kjarnorkutilraunina harðlega. Bandaríkjaforseti segir aðgerðir Norður-Kóreumanna ógna friði og öryggi í heiminum.

Rússar og Kínverjar vilja aftur viðræður við Norður-Kóreumenn svo semja megi við þá um að leggja kjarnorkuáætlun sína á hilluna.

Vilja koma í veg fyrir afskipti umheimsins

Sérfræðingar segja ýmist að Norður-Kóreumenn hafi með tilrauninni viljað koma sínum málum ofar á aðgerðalista nýrra Bandaríkjastjórnar. Aðrir að það hafi átt að koma í veg fyrir möguleg afskipti umheimsins þegar komi að því að skipta um leiðtoga en mikið hefur verið rætt og ritað síðustu misseri um meint heilsuleysi leiðtogans Kim Jong-il.