Barnalíknarsamtök enn á hrakhólum vegna Kaupþings

Stjórnendur breskra líknarsamtaka fyrir börn sem hafði lagt 5,7 milljónir sterlingspunda inn á Singer & Friedlander banka Kaupþings í Bretlandi segja að breska ríkið ætli að skilja heimilið eftir úti í kuldanum.

Peningar Naomi House líknarsamtakanna í Sutton Scotney í Hampskíri, sem jafngilda um 930 milljónum íslenskra króna, voru geymdir á reikningi Singer & Friedlander banka Kaupþings. Stjórnendur samtakanna segja að velferðarráðherrann Kevin Brennan hafi tilkynnt þeim bréfleiðis að hann gæti ekki hjálpað heimilinu neitt. Stjórnvöld ætli að styðja allar velgjörðarstofnanir í niðursveiflunni, ekki einungis þær sem höfðu átt viðskipti við Íslendinga. Stjórnendur Naomi House sögðu við BBC fréttastofuna að fréttirnar væru mikið áfall.

Khalid Aziz, stjórnarformaður Naomi House, sagði í yfirlýsingu að stjórnendur heimilisins væru slegnir yfir því að ráðherrann hefði ekki getað fundið lausn á málum þeirra. „Margar fjölskyldur eiga í engin hús að venda nema til okkar," segir Aziz. Hann segir að mögulega þurfi að fresta opnun nýs heimilis fyrir unglinga og ungt fólk. Í desember hætti Naomi House með heimaþjónustu sína vegna falls Singer & Friedlander. Í bréfi sem velferðarráðherrann sendi Naomi House segir hann að stjórnvöld geti ekki gripið til sértækra ráðstafana fyrir samtökin.