Strachan er besti stjóri sem ég hef spilað fyrir

Framherjinn Robbie Keane hjá Tottenham hefur spilað undir stjórn 19 knattspyrnustjóra á 12 ára ferli sem atvinnumaður. Hann segir Skotann Gordon Strachan vera besta stjórann sem hann hefur spilað fyrir.

Keane hefur komið víða við á ferlinum og því verður þessi yfirlýsing hans að teljast nokkuð merkileg. Keane spilaði fyrir Strachan þegar hann var hjá Coventry fyrir aldamótin.

Keane var aðeins 19 ára gamall þegar Strachan keypti hann á 6 milljónir punda frá Wolves, sem þá var metfé fyrir svo ungan leikmann. Keane skoraði 12 mörk í 31 deildarleik fyrir liðið áður en hann var seldur til Inter fyrir 13 milljónir punda.

"Vera mín hjá Coventry var gríðarlega mikilvægur tími á ferlinum. Þar fékk ég að vinna með Gordon Strachan, besta stjóra sem ég hef haft á ferlinum. Hann er frábær að eiga við leikmenn sína og nær alltaf því besta út úr þeim," sagði írski markahrókurinn í samtali við Sun.