Upp­gjörið: Frankfurt - FH 4-1 | Stór­liðið batt enda á Evrópudraumi FH

FH er úr leik í Evrópubikar kvenna eftir svekkjandi 4-1 tap gegn Eintracht Frankfurt í seinni leik liðanna í 2. umferð umspilsins í dag. FH-ingar áttu frábæra frammistöðu í fyrri leiknum og héldu stórliðinu lengi vel í skefjum, en að lokum reyndist Frankfurt of stór biti.

Heimakonur byrjuðu leikinn vel og sköpuðu sér ágætis færi sem þeim tókst þó ekki að nýta. FH stóð á sama tíma vaktina vel varnarlega og Aldís Guðlaugsdóttir var örugg þegar á reyndi.

Á 12. mínútu skoraði Nia Raisa Christopher glæsilegt skallamark eftir frábæran undirbúning frá Ingibjörgu Magnúsdóttur.

Frankfurt var töluvert hættulegra liðið en fleiri urðu mörkin ekki í fyrri hálfleik og fór FH því með 1-0 forystu inn í hálfleikinn.

Frankfurt jafnaði metin strax á 46. mínútu. Larissa Mühlhaus, sem hafði komið inn á í hálfleik, kom boltanum í netið, 1-1. Köld vatnsgusa fyrir FH eftir frábæra frammistöðu í fyrri hálfleik.

Laura Freigang kom Frankfurt síðan yfir tíu mínútum síðar áður en Hanna Bennison bætti við þriðja marki heimakvenna skömmu síðar.

Hayley Raso bætti svo við fjórða markinu. Aldís varði upphaflega skot heimakvenna en Raso náði frákastinu og potaði boltanum í netið.

FH er því úr leik í Evrópubikarnum eftir hetjulega baráttu gegn einu sterkasta liði þýska kvennaboltans.

Atvik leiksins

Það verður að vera mark Niu í fyrri hálfleik. Gaf okkur góða von og slökkti algjörlega á stuðningsmönnum þýska liðsins.

Stjörnur og skúrkar

Aldís Guðlaugsdóttir var líklegi besti leikmaður FH í leiknum.

Fyrri hálfleikur var heilt yfir mjög góður hjá FH-ingum og frammistaða sem liðið getur verið stolt af.

Stemning og umgjörð

Mjög góð mæting á völlinn og fínasta steminng.

Dómarar

Dómarateymið kom í þetta sinn frá Sviss. Deborah Anex var á flautunni og henni til aðstoðar voru þær Belinda Brem og Melissa Correia Dos Santos. Fjórði dómari var Laura Mauricio.

Dómgæslan var heilt yfir fín og nokkuð sanngjörn.