Coventry fékk skell - Aron meiddist

Coventry City steinlá 4-0 fyrir Plymouth á útivelli í ensku B-deildinni í dag. Þetta var versta tap liðsins á leiktíðinni og missti liðið Aron Gunnarsson meiddan af velli eftir aðeins 25 mínútur.

Chris Coleman knattspyrnustjóri var að vonum óhress með þessa niðurstöðu. "Ég verð hreinlega að biðja stuðningsmennina afsökunar á þessum úrslitum. Við spiluðum svo vel á móti Palace og svo kemur þessi skellur. Þetta var andstæðan við þann leik," sagði Coleman og sagði meiðsli lykilmanna ekki vera að gera sér lífið auðveldara.

"Við erum með sex leikmenn í meiðslum og svo misstum við Aron Gunnarsson meiddan af velli eftir 25 mínútur. Ég er ekki að segja að það sé ástæða þess að við töpuðum 4-0. Við töpuðum svona af því of margir leikmenn voru ekki að vinna vinnuna sína," sagði Coleman óhress í viðtali á heimasíðu Coventry.

Burnley vann 1-0 sigur á QPR í einvígi tveggja Íslendingaliða. Jóhannes Karl Guðjónsson kom inn sem varamaður í lokin hjá Burnley en Heiðar Helguson kom ekki við sögu hjá QPR.

Stöðuna í ensku B-deildinni má sjá hér.