Þrír danir um borð í vélinni

Christian Kønigsfeldt sendiherra Danmerkur í Brasilíu segir að þrír danir hafi verið um borð í farþegaflugvél Air France sem óttast er að hafi hrapað rétt fyrir utan Brasilíu í nótt. Vélin var á leið frá Rio de Janero til Parísar. Óttast var að fleiri danir væru um borð fyrr í dag.

„Við erum nú komin með nýjan lista í hendurnar þar sem eru þrjú dönsk nöfn. Það eru ekki lengur sex nöfn á listanum eins og við héldum fyrst," segir sendiherrann í samtali við Extraladet í dag en hann segist ekki vita hvaða fólk þetta sé.

„Við höfum nöfnin en vitum ekki meira um þau," segir sendiherrann sem vill ekki segja til um hvort það séu karlmenn, konur eða börn sem um ræðir.

Vélin hefur ekki enn fundist en flugvélar sveima nú yfir svæðinu þar sem óttast er að vélin hafi hrapað. Rétt áður en hún hvarf af ratsjám kom boð um bilun í rafmagnsbúnaði, en óttast er að elding hafi farið í flugvélina.

Þetta mun vera mannskæðasta flugslys Air France frá upphafi.