Rasmussen gæti mætt mótlæti frá Tyrkjum

Ekkert gæti orðið úr fyrirætlunum Anders Foghs Rasmussens, forsætisráðherra Dana, um að verða næsti framkvæmdastjóri NATO.

Ástæðan er sú að ríkisstjórnin í Tyrklandi, sem er eina múslimalandið í NATO, er líkleg til þess að gera stórkostlegar athugasemdir við valið á Rassmusen fari svo að hann gefi kost á sér í starfið. Orsökin fyrir mótlæti Tyrkjanna er sú að þeim þykir Anders Fogh ekki hafa tekið nógu vel á málefnum múslima, til dæmis í Múhameðsteikningamálinu. Þá er efast um að Rasmussen sé rétti aðilinn til að taka á málefnum Afganistan í embætti framkvæmdastjóra NATO.

Jaap de Hoop Scheffer mun láta af starfi framkvæmdastjóra NATO í ár og herma heimildir frá Danmörku að Rasmussen hafi mikinn áhuga á starfinu þegar að hann lætur af störfum.

Greint var frá þessu á vef DR, danska ríkisútvarpsins.