Hjálparstarfsmenn reknir úr landi vegna ákæru um stríðsglæpi

Stjórnvöld í Súdan hafa rekið tíu hjálparstofnanir úr landi vegna stríðsglæpaákæru Alþjóða glæpadómstólsins á hendur forseta landsins. Í gær var handtökuskipun gefin út á hendur honum vegna ódæða í Darfúr-héraði í Vestur-Súdan. Forsetinn segist saklaus og ætlar hvergi að fara.

Um þrjú hundruð þúsund manns hafa fallið í bardögum stjórnarhers og uppreisnarmanna sem hófust í Darfúr-héraði í vesturhluta Súdans í febrúar 2003. Einnig hafa arabískir vígamenn úr Janjaweed hersveitum farið myrðandi um héraðið og talið að það hafi þeir gert með vitund og vilja stjórnvalda í Súdan. Nærri þrjár milljónir manna eru á vergangi vegna átaka og morða.

Omar al-Bashir, forseti Súdans, er ákærður fyrir glæpi gegn mannkyninu og stríðsglæpi í Darfúr er ekki ákærður fyrir þjóðarmorð líkt og talið var að yrði gert. Hann neitar sök og segir ákæruna samsæri Vesturlanda gegn sér.

Á baráttufundi í Khartoum höfuðborg Súdans í morgun sagði al-Bashir að hann ætlaði ekki að leggjast á hnén fyrir framan leiðtoga Vesturlanda. Hann væri ekki stríðsglæpamaður heldur leiðtogar Bandaríkjanna og Bretlands. Þeir vildu fá menn hliðholla sér til valda í Súdan og þannig ná auðlindum á borð við olíu þar undir sig.

Súdönsk stjórnvöld viðurkenna ekki lögsögu glæpadómstólsins enda hafa þau ekki fullgilt sáttmálann um hann. Því verði enginn framseldur til hans.

Síðdegis í gær tilkynntu svo súdönsk stjórnvöld að leyfi tíu hjálparsamtaka til að starfa í landinu, þar með talið í Darfúr-héraði, yrði afturkallað og starfsmönnum vísað úr landi. Þarna er um að ræða samtök á borð við Læknar án landamæra, Oxfam og Save the Children. Ráðamenn í Súdan segja samtökin öll starfa á pólitískum forsendum í landinu og því rétt að reka starfsmenn þeirra úr landi.

Leiðtogar Afríkusambandsins koma saman til fundar um ástandið í Addis Ababa í Eþíópíu í dag. Forvígismenn sambandsins höfðu ráðið glæpadómstólnum frá því að gefa út handtökuskipun því hún myndi stefna friðarviðræðum í Darfúr í hættu.