Átök hvalveiðimanna og liðsmanna Sea Shepherd

Hvalverndarsinnar segja japanska hvalveiðimenn hafa slasað tvo úr þeirra hópi með járnplötum og golfkúlum þegar sló í brýnu milli milli þeirra í Suðuríshafi í gær. Hvalverndarsinnar voru þá að trufla veiðar. Japönsku hvalveiðimennirnir neita sök og segjast bara hafa sprautað vatni á þá.

Japönsk hvalveiðiskip eru nú við veiðar í Suðuríshafi. Áformað er að veiða níuhundruð þrjátíu og fimm hrefnur og fimmtíu langreyðar. Hvalverndarsinnar úr Sea Shepherd samtökum Pauls Watsons hafa reynt hvað þeir geta til að trufla veiðarnar. Í gær hentu þeir þránuðu smjöri í hvalveiðiskip og veiðimenn og skvettu málningu á þá. Veiðimennirnir munu að sögn hvalverndarsinna hafa svarað með því að sprauta vatni á mótmælendur en einnig hafi þeir kastað í þá golfkúlum og járnplötum. Tveir hvalverndarsinnar munu hafa meiðst í átökunum. Japönsku veiðimennirnir segjast aðeins hafa sprauta vatni á mótmælendur.

Átökin blossuðu upp þar sem hvalverndarsinnarnir sigldu á tveimur slöngubátum að hvalveiðiskipunum meðan sumir sátu í þyrlu sem flogið var að skipunum. Vont var í sjóinn á þeim tíma þar sem þeir voru rúmlega þrjú þúsund kílómetrum suð austur af Tasmaníu.

Japönsk yfirvöld hafa kvartað til ráðamanna í Ástralíu og Nýja Sjálandi vegna aðgerða Sea Shepherd og biðja um aðstoð landhelgisgæslunnar þar. Japanir hafa einnig kvartað til Hollendinga þar sem skip Sea Shepherd Steve Irwin er skráð.