Obama ætlar að gera allt til að örva hagkerfið

Barack Obama, forseti Bandaríkjanna, hét því í dag að gera allt sem þyrfti til þess að örva hagkerfið en sagði jafnframt að erfiðir tímar væru framundan fyrir Bandaríkjamenn. Obama, sem hefur hrint af stað ýmsum aðgerðum til að fást við kreppuna frá því að hann tók við embætti þann 20. janúar síðastliðinnm, sagðist jákvæður á að þær aðgerðir myndu skila sér þrátt fyrir að nú væru atvinnuleysistölur að hækka og niðursveifla væri í hagkerfinu.

„Allt frá því ég tók við embætti hefur það verið mér ljóst að það yrði ekki auðvelt að leysa þessa kreppu. Ég vissi jafnframt að hún yrði ekki leyst á einni nóttu og við munum halda áfram að mæta erfiðleikum á næstu mánuðum," sagði Barack Obama í vikulegu útvarpsávarpi sínu. „Ríkisstjórn mín er staðráðin í því að gera allt sem nauðsynlegt getur talist til þess að fást við kreppuna og gera framtíðina bjartari," sagði Obama.

Þá sagði Obama að það væri alveg ljóst að nauðsynlegt væri að gera breytingar á heilbrigðiskerfinu með það að markmiði að draga úr kostnaði og fá lausn á vanda þeirra sem hefðu ekki sjúkratryggingar.