Flugfélag sendir farþegana á salernið

Japanska flugfélagið All Nippon Airways hvetur farþega sína til að bregða sér á salernið og létta á sér áður en þeir stíga um borð í vélar félagsins. Ekki er þetta gert til að fyrirbyggja klósettráp í fluginu heldur til að draga úr losun gróðurhúsalofttegunda en reiknimeistarar flugfélagsins hafa komist að þeirri niðurstöðu að hafi helmingur farþega létt á sér fyrir flug dragi það svo úr eldsneytiseyðslu flugflotans að 4,2 tonnum minna af koltvísýringi fari út í andrúmsloftið á mánuði. Hér er um að ræða einn lið tilraunar sem standa mun allan októbermánuð en um leið mun flugfélagið nota glös úr endurunnum pappa um borð og sýna fræðslumyndir um umhverfisvernd í fluginu.