N-Kórea: Þremur eldflaugum skotið á loft

Auk þess að sprengja kjarnorkusprengju neðanjarðar í nótt hafa Norður-Kóreumenn það sem af er morgni skotið á loft þremur skammdrægum eldflaugum. Ekki er ljóst á þessari stundu hvert flaugunum var miðað eða hvar þær lentu.

Javier Solana utanríkisráðherra Evrópusambandsins fordæmdi í morgun kjarnorkutilraunir N-Kóreumanna og sagði þær ógna friði á svæðinu og öryggi í Norðaustur-Asíu. Solana sagði að Evrópusambandið myndi hafa samband við yfirvöld í landinu og koma mótmælum sínum formlega á framfæri auk þess sem rætt verði við bandamenn sambandsins til þess að ákveða næstu skref í málinu. Hann benti einnig á að tilraunin væri í skýrt brot á ályktun Öryggisráðs Sameinuðu Þjóðanna.

Aðrir þjóðarleiðtogar á borð við Gordon Brown forsætisráðherra Bretlands og Barack Obama Bandaríkjaforseti hafa í morgun tekið í svipaðan streng og mótmælt tilraununum harðlega.