Danska lögreglan lagði hald á tvöfalt fleiri vopn

Vopnasérfræðingar dönsku lögreglunnar lögðu hald á tvöfalt fleiri vopn árið 2008 en árið 2007. Um það bil helmingur af vopnunum kemur frá Balkanskaga og Austur - Evrópu en lögreglan veit ekki með vissu hvernig skotvopnunum er smyglað inn í landið.

„Við reiknum með því að þau komi inn í landið á sama hátt og fíkniefni, það er að segja þeim er smyglað inn í landið í gegnum Evrópu með ólíkum hætti, í gámum og vörubílum," segir Svend Foldager, rannsóknarlögreglumaður hjá Kaupmannahafnarlögreglunni.

Danska lögreglan getur fyrst haft afskipti af skotvopnum þegar búið er að smygla þeim yfir landamærin, en landamæraverðir eiga að sjá um allt eftirlit við landamærin. Það virðist hins vegar ekki ganga nægilega vel því að ekki var lagt hald á eitt einasta vopn við landamæri Danmerkur og Þýskalands á síðasta ári.

Orla Olesen, formaður danska Tollvarðafélagsins og fyrrverandi tollvörður við landamærin, segir að ástæðan sé sú að tollverðir við dönsk-þýsku landamærin séu allt of fáliðaðir.