Jóhannes skoraði úr sínu víti

Ensku liðin eru á fullu þessa dagana að undirbúa sig fyrir komandi tímabil sem hefst í ágúst. Jóhannes Karl Guðjónsson og Brynjar Björn Gunnarsson voru báðir í eldlínunni í æfingaleikjum í gær.

Jóhannes Karl tók eitt af vítum Burnley í vítaspyrnukeppni þegar liðið vann Portland Timber í Bandaríkjunum. Burnley vann vítaspyrnukeppnina eftir að staðan hefði verið 2-2 eftir venjulegan leiktíma.

Brynjar Björn Gunnarsson skoraði eitt af átta mörkum Reading sem burstaði neðrideildarliðið Jonsered 8-0. Brynjar var fyrirliði Reading í leiknum. Þá má geta þess að Grétar Rafn Steinsson lék fyrri hálfleikinn fyrir Bolton sem gerði 1-1 jafntefli við Borussia Mönchengladbach í Þýskalandi.